बेटी पढाउ बेटी बचाउँ कार्यक्रम पैसाको बार्गेनिङ गर्ने स्रोत पो बन्यो

मधेश प्रदेशबाट प्रत्यक्षतर्फको सिटमा जनता समाजवादी पार्टीको तर्फबाट निर्वाचित प्रह्लाद गिरी यहि भाद्र ४ गते नेकपा एमालेमा प्रवेश गर्नुभएको छ । नेकपा एमालेका अध्यक्ष केपी शर्मा ओलीले उहाँलाई पार्टीमा भित्राएर उचित जिम्मेवारी दिने बताउनुभएको छ । मधेशका जनताको मुद्दा बनाएर राजनीतिमा उदय भएका उपेन्द्र यादवले त्यहाँका जनताको हितमा केहि नगरेको बताउने गिरीको प्रवेशले आगामी प्रदेश र संघको निर्वाचनमा नेकपा एमालेका निमित्त कोशेढुंगा सावित हुने कुरामा दुई मत छैन । यसै विषयमा केन्द्रीत रहेर डायरी एक्सप्रेस साप्ताहिकका कार्यकारी सम्पादक नारायण प्रसाद शर्माले गरेको कुराकानीः

० तपाई जसपाबाट भरखरै नेकपा एमालेमा प्रवेश गर्नुभएको छ । त्यसको मूख्य कारण बताइदिनुहोस् न ?
नेपालको राजनीतिक अवस्थामा सत्ता गठबन्धनका दलका कुराहरु, मधेशका राजनीतिक कुराहरु हेर्दा देश अहिले दिशाहिनता तर्फ उन्मुख छ । राष्ट्रलाई हाक्न सक्ने कुशल नेतृत्वका आवश्यकता छ । केपी ओली बाहेक राजनीतिलाई सहि दिशामा लैजाने कोहि मानिस छैनन् । यो देशको राष्ट्रिय आवश्यकता हेरेर नै हामीले काम गर्नुपर्छ । म कोअर्डिनेशन कमिटी (कोके) को समय देखि नै पर्सा जिल्लाको पार्टी निर्माणमा संलग्न हुँदै आएको हुँ । बीचमा व्यवहार र परिस्थितिका कारण यो पार्टी छाडे पनि अहिले पुनः प्रवेश गरेको छु । पाँच दलिय गठबन्धन केबल सत्ता भागवण्डाका लागि मात्रै बनेको हो । यसले देश र राष्ट्रका लागि कुनै काम गर्दैन ।

० उपेन्द्र यादवको नेतृत्वमा जसपा पार्टी पछिल्लो अवस्थामा पार्टी तीन टुक्रा भयो कारण के हो ?
उपेन्द्र यादवले मधेशको राजनीतिमा समावेसीका कुराहरु गर्नुभयो । साथै हिमाल, पहाड र तराई जोड्ने कुरा गर्नुभयो । तेस्रो शक्ति निर्माणका कुराहरु पनि गरिए । तर, व्यवहारिक रुपमा उहाँभित्र एकल जातिय अहंकार छ । उहाँका जातका मानिसहरु ल्याएर शासन कायम गर्ने मात्रै सोच उहाँ भित्र छ । सबैलाई सन्तुष्ट गराएर नेतृत्व गर्नसक्ने क्षमता नै छैन । त्यसै कारण मानिसहरु टिक्न र खप्न नसकेका कारण बारम्बार पार्टी टुक्रिने गर्दछ ।

० एकथरी नेताहरु उपेन्द्र पार्टी र शक्ति केन्द्रहरु पनि परिवर्तन गरिरहन्छन् भन्ने आरोप लगाउँछन् । तपाईलाई के लाग्छ ?
उहाँ नेपालमा कुनै शक्ति केन्द्रको मोहोरा पनि हो । मोहोराकै रुपमा पनि प्रयोग भइरहँनुभएको छ । नामै त नखोलौं । जनताहरु बुझिरहेका छैनन् । उनका कुरामा अव मधेसी जनता लाग्ने छैनन् ।

० रेणु यादवलगायतका जसपा नेताहरु पनि एमालेमा प्रवेश गर्ने हल्ला बजारमा आएको छ नी ?
मैले पनि सुनिरहेको छु र रेणु यादव लगायतको टीम एमाले प्रवेश गर्ने भनेर । यो त राम्रो कुरा हो ।

० मधेश प्रदेशमा आगामी निर्वाचनमा नेकपा एमालेले कति सिट जित्ने अनुमान गर्नुभएको छ ?
नेकपा एमाले पार्टी व्यवस्थित ढंगले अघि बढेको खण्डमा बहुमत त नभनौं एक नम्बर पार्टी चाहिँ पक्कै बन्छ । किनकी मधेश प्रदेशमा अहिले एमालेकै लहर छ । र, पाँच दलिय गठबन्धनमा जनताको कत्ति पनि विश्वास छैन । तथापि एमाले भित्र पनि केहि समस्या छन् । सामुहिक नेतृत्वलाई स्वीकार नगर्ने मानिसहरु पनि यहाँ छन् । आफ्नो व्यक्तिगत स्वार्थ पुर्ति गर्न खोज्नेहरु पनि छन् । त्यो सबै अवरोध पन्छाएर सहि मुल्यांकन गरेर सहि व्यक्ति चयन गरेको खण्डमा नम्बर वान पार्टी चाहिँ बन्छ ।

० मूख्यमन्त्री लालबाबु राउतले ल्याएको ‘बेटी पढाउँ बेटी बचाउ’ कार्यक्रमको साइकल खरिद प्रकणमा पनि मूख्यमन्त्री स्वयं संलग्न भएको अवस्थामा अख्तियारले बचाएको आरोप छ नी के भन्नुहुन्छ ?
‘बेटी पढाउँ बेटी बचाउ’ भन्ने नारा नै उल्टो छ । यो नाराका विषयमा त्यो पार्टीमा रहँदा धेरै बहस गरेको छु । मधेशमा त बेटी बढेपछि भाग्छन् भन्नेहरु छन् । बचाउने कुरा कहाँबाट आयो ? छोरी गर्भमा भएकै कारण भ्रुण हत्या गरिन्छ, भने कहाँबाट बचाउने कुरा आयो ? यो कार्यक्रम अन्तर्गत साइकल खरिदमा व्यापक भ्रष्टाचार भएको छ । यो कुरा त मैले दुई वर्ष अघि नै भनेको थिएँ । यो कमिसनको खेल मात्रै हो । साइकल बाड्दा पनि आफ्नो क्षेत्रमा मात्रै बाडिएको छ । अन्य क्षेत्रमा दिइएको पनि छैन । विभेद पनि गरिएको छ । साइकलहरु पनि छ महिना भन्दा बढि नटिक्ने कमसल अवस्थाका छन् । यसमा कमिसन र ठूलो रकमको चलखेल भएकै हुन् । कसले कति खायो र कसलाई बचायो ? हामी १५÷१६ जना प्रदेश सभाका सदस्यहरु उपेन्द्र यादव कहाँ डेलिगेसनमा गएका थियौं । यो कार्यक्रममा भ्रष्टाचार भयो भनियो । हामीले उजुरी गरेका मात्रै थियौं उपेन्द्र यादवलाई त पैसाको स्रोत पो बन्यो । उनलाई त बार्गेनिङ गर्ने ठाउँ पो बन्यो । उनले त माल लिएर आउ नत्र हटाइदिन्छु तिम्रो विरुद्धमा यस्तो भइरहेको छ पो भनेछन् ।
० तराईमा छोरीहरु जन्मेकै कारण र दाइजोको मोहले गर्दा कतिपय आमाहरुको परिवारबाटै हत्या भएका घट्नाहरु पनि सुनिन्छन् । त्यसको लागि कसरी न्यूनिकरण गर्न सकिन्छ ?
यो मधेसको समाजमा पुरानै मनोविज्ञान हो । हुन त देशको सबैजसो ठाउँमा त्यो खालको अवस्था छ । अझ बढि मधेशमा छ । छोरी जन्मेपछि नाक खुम्च्याउने चलन छ । तथापि समाजमा बिस्तारै परिवर्तन भइरहेको छ । केहि प्रतिशत मानिसहरु मात्रै त्यो प्रवृतिका छन् । अहिले त्यो अवस्था छैन ।

० तपाई पुरानो कम्युनिस्ट नेता जनताहरुले कम्युनिस्ट प्रति आशा र अपेक्षा गरेपनि फुटका कारण अन्य इतर पार्टीहरुले नेतृत्व गरेका छन् । अबको चुनावको रणनीति कस्तो हुनुपर्दछ ?
हाम्रो लागि बहुत दूर्भाग्यको कुरा हो । नेकपा एमालेको निर्माणमा लागेका धेरै मान्छेहरु एमाले पार्टी भन्दा बाहिर छन् । कम्युनिस्ट पार्टीको सिद्धान्तबाट चुनिएका मानिसहरु आफ्नो व्यक्तिगत स्वार्थमा रुमलिए । वास्तवमा दुई तिहाईको कम्युनिस्ट पार्टीको सरकार हुँदा हुँदै प्रचण्ड, माधव, झलनाथजीहरु त्यो आन्दोलनलाई हाकेको भएपनि अहिले कांग्रेसको पछि पछि दयाको पात्र बनेर लुरु लुरु हिड्नुभएको छ । नेताहरुकै कारण पार्टीमा टुट र फुट भएको हो । यो नै बामपन्थी आन्दोलनको दूर्घट्ना हो । नेताहरु सुध्रिनुपर्दछ । समयको दौरानमा जनताले पाठ सिकाउने नै छन् ।

० नेपाली कांग्रेसका एक जना नेताले केहि दिन अघि एक कार्यक्रममा बालुवाटार प्रकरणमा माधव नेपाल जेल जाने अवस्था आयो । उनलाई बचाउनका लागि शेर बहादुर देउवाले ओलीको विरुद्धमा मोर्चा बनाउनु परेको हो भन्नुभएको छ नी ?
हुन सक्छ । टप लेबलमा सिंहदरबार र यसको अगलबगलमा यो विषय हुन सक्छ । जनता झुक्याउन र भुलाउन सबै पार्टीहरु समाजवाद अप्नाएको भन्दैछन् । कम्युनिस्ट केन्द्र बनाउने भन्दा भन्दै समाजवादी केन्द्र बनाने भन्दै झुक्याएका छन् । देउवाको पछि पछि लागेर समाजवाद आउँछ ? समाजबादी केन्द्रको निर्माण होला ? हिजो मतियार बनेर लुरुलुरु हिडिरहेका नेताहरुको हिसाव किताव जनताले आउने दिनमा देखाउनेछन् ।

० अन्तमा केहि भन्नु छ की ?
काठमाडौंमा बस्ने मानिसहरु मधेसमा बस्नेहरुलाई फरक दृष्टिकोणले हेर्नुहुन्छ । त्यो राख्नु हुँदैन । म एमाले प्रवेश गरेको कार्यक्रममा पनि भनेको थिएँ । राजा महाराजाको पाला देखि नै अपमान र बिभेद गर्ने अवस्था चलिरह्यो । मधेशका मानिसहरुको अनुहार हेर्ने बित्तिकै बिहारको मानिस भन्ने गरिन्छ । हामी सच्चा माक्र्सबादी हौ भने माक्र्सवादले हरेक किसिमका शोषण, दमन, विभेदको उन्मुलन गरेर समतामूलक समाज निर्माण गर्ने हो । जातिय, बर्गिय, धार्मिक र सामाजिक बर्गियको बिरोध गरेर एउटा नयाँ समाज निर्माण गरी अघि बढेको खण्डमा मात्रै साम्यवादमा जान सकिन्छ । मधेसी जनताको अढाई सय वर्ष अघि देखिको भावना नेकपा एमाले जस्तो पार्टीबाट नेतृत्व गर्न आवश्यक थियो । कम्युनिस्ट पार्टीहरु मधेश आन्दोलनको नेतृत्व गरेनन् । त्यसको नेतृत्व गर्न भ्रष्टाचारी, सामान्ति, प्रतिक्रियाबादीहरु आए । त्यसपछि मधेश आन्दोलनलाई अर्को दिशातर्फ मोडे ।
आगामी मंसिर ४ गते हुने प्रदेश र संघीय निर्वाचनमा नेकपा एमालेले बहुमत प्राप्त गर्न सकोस् । सिद्धान्त र विचारलाइृ पाखा लगाउने तत्वहरुलाई पन्छाएर अघि बढ्न सकियोस् । तब मात्रै पार्टी सबल र सक्षम बन्नेछ ।