नेताहरु विदेशीको ताल र सुरमा नाँचेका छन् । देश नै नरहे कसको भाँडा माझ्न जाने ? नानी मैया दाहाल,

वि.स. २००३ सालमा काठमाडौंको जोरपाटीमा जन्मनु भएकी नानी मैया दाहाल २०३८ सालमा काठमाडौंबाट अत्याधिक मत ल्याएर राष्ट्रिय पञ्चायतकी सदस्य पदमा निर्वाचित हुनुभएको थियो । हाल ७७ वर्षको उमेरमा पनि जनताको काम भन्दै सडकमा हिडिरहँनुभएको छ । उहाँले सयौं जना सुकुम्बासीहरुलाई दीर्घकालिन आवासका निमित्त ठाउँ दिलाउनु भयो । राष्ट्रिय पञ्चायतको सदस्य हुँदा पीडितले समयमा न्याय नपाएको भन्दै जनताको काम नगर्ने मन्त्री र प्रधानमन्त्री माथि नै हातपात गर्न जाई लागेका कारण उहाँ चर्चित पनि हुुनुुहुन्थ्यो । बाबु धनञ्जय दाहालको चार सय रोपनी जग्गा भएको भए पनि अहिले उहाँसँग बस्नका लागि आफ्नो नाममा घरसमेत छैन । उहाँ बहिनीको छोराको घरमा बस्ने गरेको बताउनुहुन्छ । दाहालसँग डायरी एक्सप्रेस साप्ताहिकका तर्फबाट नारायण प्रसाद शर्मा पोखरेलले वर्तमान राजनीतिक अवस्थाका बारेमा गरेको विशेष कुराकानीः

० तपाई वि.स. २०३८ सालको सालमा काठमाडौं जिल्लाबाट राष्ट्रिय पञ्चायत सदस्यमा निर्वाचित हुनुभयो । अहिलेको राजनीतिलाई कसरी मुल्यांकन गरिरहँनुभएको छ ?
अहिले राजनीतिक ठीक लाइनमा छैन । हाम्रो देशमा जनताको काम गर्ने नेताहरु आएका छैनन् । नेताहरु पुरै ब्यक्तिगत स्वार्थमा डुबेका छन् । नेपाल हिन्दूहरुको देश हो । यहाँ जन्मन एक सय वर्ष तपस्या गर्नुपर्दछ । विश्वभरमा एक मात्र हिन्दू राष्ट्र भएको देश जहाँको पशुपति नाथको मन्दिरमा विश्वभरका हिन्दूहरु आएर शीर झुकाउने गर्दछन् । पशुपतिमा दर्शन गरेपछि सबैजनाको इच्छापुरा हुन्छ भन्ने भनाई छ । यस्तो देशमा धर्म निरपेक्ष बनाएर, देश टुक्राउने र भारतमा मिलाउन खोज्नु ठीक हो ? राजतन्त्र हटाइयो । किनकी नेपालमा राजतन्त्रको आवश्यक छ । यहाँ राजतन्त्र र हिन्दू राष्ट्र बनाउनै पर्छ । संसदमा प्रतिनिधित्व गर्ने सांसदहरु सरकारको कर खाएर पनि क्रिश्चियन धर्मको प्रचार गरेका छन् । देश रह्यो भने मात्रै हामी नेपाली भनेर रहन सक्छौं, देश नै नरहे कसको भाडा माझ्न जाने ? यी नेताहरुको खोपडीमा भगवान पशुपति नाथले किन आर्शिवाद नदिएका होलान् ?
हामी देशका लागि लड्नुपर्दछ, आफ्नो पेट त कुुकुरले पनि पाल्छ । हामी मर्दा पैसाले पोल्ने होइन । मलाई साह्रै दुःख लागेको कुरा के हो भने यहाँका नेताहरु कुनै देशमा गएर एमसीसी सम्झौता गरी आए । जुन देशमा फाप्दैन । देशको हितमा छैन ।
अमेरिकामा निर्वाचित भएपछि किस्चियनको बाइबल छोएर सपथ नखाइ राष्ट्रपति हुन पाइदैन । हाम्रो देशको धर्म, संस्कृति, संस्कार, परम्परालाई कसैले पनि मास्न पाइदैन । रामको पालामा सूर्यबंशी, कृष्णको पालामा चन्द्रबंशी भनेर चन्द्र र सूर्य अंकित झण्डा हाम्रो देशको राष्ट्रिय झण्डा छ । त्यसैकारण हाम्रो इतिहास पुरानो छ । अहिलेका नेताहरु इतिहास मेटाउन चाहन्छन् । जे पनि गर्छन् । व्यक्तिगत पैसा कमाउने गरिएको छ । संसारभरमा यहाँ जस्तो गठबन्धन सरकार कहिँ देखिएको छैन । सबैजना मिलेर बाँडफाँड गरी राज्य दोहोन गरिएको छ । जनता महंगीको मारमा छन् । दाल, चामल र तेल अत्याधिक महंगो छ । हातमुख जोर्न धौ धौ छ ।
नेताहरुले जब राजतन्त्रको अन्त गरे, यहाँ भयानक भूकम्प गयो । भुवानपत्ये स्वाहा भनेर भनिन्छ । भूमिको पति राजा हुन् । राजा नभई देश चल्दैन । राजतन्त्र अनिवार्य चाहिएको छ । यहाँ त जजमान गरेर खानुपर्ने नेताहरु देश टुक्राटुक्रा पारेर बेच्दैछन् । प्रदेश बनाएर देश टुक्रा टुक्रा पारिएको छ । पञ्चायतकालमा १४ अञ्चल ७५ जिल्लामा बिभाजित गरिएको थियो । हाम्रो देश कुनै बेला पट्ना, गोरखपुर देखि हाम्रै राज्य थियो ।
नेपालका पाँच हजार सैनिकले जीवन आहुती दिएर भारत स्वतन्त्र भएको हो । हाम्रा पाँच हजार सिपाही अंग्रेजको विरुद्धमा नलडेको भए भारत अहिले पनि अंग्रेजको उपनिवेश रहिरहन्थ्यो । यहाँका राणाहरुले पैसा दिएर कबाज खेलाउँथ्यो । महात्मा गान्धीले पनि नेपालीहरुकै कारण भारत स्वतन्त्र भएको हो भन्ने कुरा स्वीकार गरेका थिए ।
भारतमा लडेका सिपाहीहरुकै पेन्सन रकम खर्च गरेर पद्यकन्या कलेज स्थापना गरिएको थियो । भारतले नेपालका दास नेताहरु उचालेर नेपाली भूभाग लिन मिल्दैन । किनकी भारत स्वतन्त्रताका लागि लडेका हाम्रा पाँच हजार सैनिकहरुले सराप दिनेछन् । यसरी महात्मा गान्धीले नै नेपालीहरुको ऋण तिर्न सकिदैन भनेका थिए । तर, अहिले त्यहि भारतले हाम्रो कालापानी, लिपुलेक, लिम्पियाधुरा, सुस्ता लगायतको भूमि अतिक्रमण गरेको छ । यी ‘भुस्याहा’ नेताहरु चुप लागेर बसेका छन् । भारतले पनि यस्तो काम गर्न सुहाउँदैन

० वास्तवमा खराव मोदी हुन् कि यहाँका नेताहरु हुन् ?
मोदीले मादल बजाउँछन्, यिनीहरु नाँच्छन् । यिनीहरुले आफ्नो संस्कार, संस्कृति र राज्य हेरेका छैनन् । यिनीहरु त विदेशीका ‘कमरा’ बनेका छन् ।

० अहिले सबैभन्दा खराव नेता को लाग्छ ? शेर बहादुर, पुष्पकमल दाहाल, केपी ओली, माधव नेपाल। उपेन्द्र यादव, महन्थ ठाकुर, वा अन्य ?

यिनीहरु सबै भ्रष्ट छन् । कुनै ठीक छैनन् । शुरो समातेर पुजा गर्नुपर्ने बह्माण नेताहरुले राजनीति गरेर देश टुक्राउन मिल्छ ?

० अहिले नै देश टुक्राएका त छैनन् नी ।
वल्लो प्रदेश र पल्लो प्रदेश भनेर किन नामाकरण गरिन्छ त ? १४ अञ्चल र ७५ जिल्ला किन भनिदैन ?

० तपाईको विचारमा देउवा सरकारले गरेको एमसीसी र एसपीपी जस्ता सम्झौताको विषयमा केहि भन्न खोज्नु भएको हो ?
राजाहरु पनि अमेरिका भ्रमणमा गएका थिए । कसैले निम्तो गरे भन्दैमा गएर सम्झौता गर्नुपर्छ ? यस्ता सम्झौता नत राजा महेन्द्रले गरे, नत बिपी कोइरालाले नै गरे ? बिपीले त राजतन्त्र चाहिन्छ भन्थे । अहिलेका माओवादी र खाओवादीहरु हिजो दरबारको भात खाएका थिए । तथापि उनीहरुले नै दरबार सिध्याए । किनभने बाबुराम भट्टराईलाई पहिला दरबारले नै पढाएको थियो । महेन्द्रले रुक्मागत कटवाललाई ल्याएर पढाए । उ महारथी बन्यो । त्यसपछि बिग्रियो । प्रचण्ड, बादल र देब गुरुङ राजावादी नै थिए । देव गुरुङ त दरवारभित्रका जमदार नै थिए । अहिले राष्ट्रपति, घरपति र श्रीमतीका पतिहरु हिजोका राजावादी नै हुन् । दरबारको भात खाए र उनीहरुलाई नै निकालिदिए ।
० तपाईले त राम्रो कामै गरेनन् भन्दै पञ्चायतका नेताहरु सूर्य बहादुर थापा लगायतको पनि विरोध गर्नुहुन्थ्यो नि ?
त्यो बेलामा राम्रो भयो भनेको होइन । सूर्य बहादुरले जहाँनियाँ पञ्चायत जस्तो गरी शासन गरे ।

० कम्यनिस्ट पार्टीहरुको बारेमा के भन्नुहुन्छ नी ?
कम्युनिस्ट भनेको सडकमा बस्ने र मन्त्री हुनेहरुको एउटा खाना र कपडा हुनुपर्दथ्यो । यहाँका कम्युनिस्टहरु नामका मात्रै हुन् उनीहरु त कमाउनिस्ट हुन् । यदि यहाँ कम्युनिस्ट पार्टी भएका भए गरिब जनतालाई किन हेरेनन् ? अहिले ब्यक्ति मौलाएको छ । यहाँ त नूनमा पनि प्रधानमन्त्रीको शेयर हुन्छ । तेलमा मन्त्रीहरुको शेयर हुन्छ ।

० कम्युनिस्ट देखि नेपाली कांग्रेसका नेताहरु आफुलाई समाजवादको पक्षपाती भन्छन् नी ?
समाजवादी भएरै त होला जनताहरु न्याय नपाएर, खानै नपाएर भोकभोकै हिडेका छन् । उनीहरुले आफैले बनाएको ऐन, कानून र संविधान मानेका छैनन् । दिन दहाडै लुटतन्त्र छ । ऐन, कानून भन्दा माथि को छ ? अहिले समाधानका लागि २०४७ सालको संविधान ब्युझाउनुपर्दछ । संवैधानिक राजतन्त्र र बहुदलिय प्रजातन्त्रको स्थापना गराउँनुपर्दछ । विश्वनाथ उपाध्याय जस्ता विद्धानले बनाएको संविधान एकदमै समसामयिक छ ।

० संविधान सभाका ६०१ जना सदस्यले बनाएको संविधान हो कसरी खारेज गर्न मिल्छ ?
उनीहरुले भन्दैमा हुन्छ । मनपरी ढंगले बनाएको संविधान कसले मान्छ । यो संविधानमा धर्म संस्कृति कहाँ छ ? धर्मनिरपेक्ष संविधान पनि कसैले मान्छ ?

० अबको विकल्प के छ ? संविधानसभाले बनाएको हुँदा कसरी मिल्छ त ?
यो संविधान विदेशीको इशारामा बनाइएको हो । उनीहरु मादल बजाएका छन् । यहाँका नेताहरु नाचेका हुन् । अमेरिकाले पैसा दिएर पठाउँछ । भारतीयहरु मादल बजाइदिएका छन् । यहाँका नेताहरु उनीहरुको ताल सुरमा नाचेका छन् । संस्कार, संस्कृति र देशप्रतिको माया र ममता नै भुलेका छन् । यिनीहरुले शासन गर्ने बित्तिकै भूइचालो जाने, कोरोना लाग्ने जस्ता प्रकोपहरु आएका छन् ।
यसमा मेरो भनाई छः

वरिपरि विश्व भरी तक्ला चलाउनेलाई ।
महाभारतको युद्धमा ज्यान गुमाउनेलाई ।।
चन्द्र सूर्य इशाराले उज्जवल गराउनेलाई,
भन्दिनु है भन्दिनु । ।
नेपाल आमा सिंहशान खाली छ ।
पृथ्वी हल्लिन थालिछ ।।
पहाड पर्वत हाम्फाल्न थालेछन् ।
खोला नाला दौडिन थालेछन् ।।
बिना कसूर ज्यानमार्न थालेछन् ।।

हिन्दू धर्ममा किरा पनि मार्नु हुँदैन । कोरोना लाग्यो भनिएको छ । अस्पतालमा जथाभावी लुट मच्चाइएको छ । जनताहरु महंगीको चरमचुलीमा छ । गरिबहरु भोकभोकै मनुपर्ने अवस्था आएको छ ।