Sun. Nov 29th, 2020

इ – डायरी एक्सप्रेस

ताजा र निष्पक्ष समाचारका लागि

विषम परिस्थितिमा महासंघको नेतृत्वमा व्यवसायिक मानिसहरुको प्रतिनिधित्व हुन जरुरी छ

1 min read

रामशरण थपलिया, एशोसिएट तर्फबाट कार्यसमिति सदस्य पदका उम्मेदवार, चन्द्र ढकाल समूह


नेपाल उद्योग वाणिज्य महासंघको ५४औ साधारण सभा तथा कार्यसमतिको निर्वाचन यहि मंसिर १३ देखि १५ गतेसम्म काठमाडौंमा हुँदैछ । चन्द्र ढकाल समूहको तर्फबाट महासंघको एशोसिएट सदस्य पदमा व्यवसायी राम शरण थपलियाले उम्मेदवारी दिनुभएको छ । यसै विषयमा डायरी एक्सप्रेस साप्ताहिकका कार्यकारी सम्पादक नारायण प्रसाद शर्माले आसन्न निर्वाचन सम्बन्धमा थपलियासँग गरिएको विशेष कुराकानीः

० तपाई नेपाल उद्योग वाणिज्य महासंघको यहि मंसिर ११ देखि १३ सम्म हुन गइरहेको साधारणसभा तथा निर्वाचनमा एशोसियट तर्फबाट कार्यसमितिको सदस्य पदमा उम्मेदवारी दिनुभएको छ । तपाईको समूहका एजेण्डाहरु के के छन् ?


अहिले नेपाल उद्योग बाणिज्य महासंघको सबै भन्दा ठूलो चुनौति भनेको व्यवसायीहरुको समस्या सम्बोधन गर्नु नै हो । जसमा पहिलो कुरा बैंकको ऋण र त्यसको ब्याज हो । साथै श्रमिकहरुको ज्याला पनि हो । कोभिड–१९ का कारण नेपालमा उत्पादन भएका सबै वस्तु तथा व्यवसायहरुको अवस्था राम्रो छैन । त्यसैमा पनि सबैभन्दा बढि प्रभावित भनेकै पर्यटन क्षेत्र हो । त्यसो त पर्यटनलगायत अन्य सबैजसो क्षेत्र नै धारासायी अवस्थामा छन् । नेपाल उद्योग वाणिज्य महासंघको चन्द्र ढकाल समूह निर्वाचित भएपछि गर्ने कामहरु भनेका व्यवसायी हक हितका निमित्त नै हो । सरकारले अर्थमन्त्रालय मार्फत सरल कर्जाका लागि बजेट बिनियोजन गरेर नेपाल राष्ट्रबैंक मार्फत जुन रुपमा कार्यन्वयन गर्नका लागि अघि पनि बढिरहेको छ । अहिले सरकारले तत्कालै गर्ने भनेको सरल कर्जा नै हो । अन्य व्यवसायमा पनि यस्ता थुप्रै समस्याहरु छन् । कृषि क्षेत्रमा सरल कर्जाका कामहरु भइरहेका छन् । त्यसै गरी अनुदान प्रदान गर्ने कुराहरु पनि भइरहेका छन् । यी व्यवसायहरु पनि नेपाल उद्योग वाणिज्य महासंघको उत्पादनको रुपमा आउँदछ । यसरी चन्द्र प्रसाद ढकालले नेतृत्व गरेको समूहमा मैले पनि एशोसियट तर्फबाट कार्यसमितिको सदस्य पदमा उम्मेदवारी दिएको छु ।


० निजी क्षेत्रलाई आम सर्वसाधारणको हेर्ने दृष्टिकोण नकरात्मक रहेको पाईन्छ । त्यसलाई परिवर्तन गराउने दिशामा यहाँको भूमिका कस्तो रहन्छ ?
हाम्रो निजी क्षेत्रले राज्यलाई समयमा कर तिरिरहेको छ । परेको बेलामा आवश्यक सहयोग गर्दै पनि आएको छ । निजी क्षेत्र कहिँ पनि चुकेको छैन । शान्ति र संविधानको घोषणा पछि निजी क्षेत्र अलिक बढि चलायमान हुन्छ भन्ने लागेको थियो त्यो हुन सकिरहेको छैन । राजनीतिक खिचातानीका कारण पनि हामीहरु प्रभावित बनिरहेका छौं । कोभिड–१९ को महामारीका समयमा पनि हामीहरु स्वतः स्फूर्त रुपमा सत्ता पक्ष होस् वा प्रतिपक्ष नै किन नहोस् व्यवसायी र देशका जनताको मनोबल कसरी उच्च बनाउने ? भन्ने विषयमा सोच्नु पर्ने थियो । तर, अहिले सत्तारुढ दलभित्रै राजनीतिक खिँचातानी फरक ढंगले अघि बढिरहेको छ । त्यो राम्रो होइन । हामीले कमाएको व्यवसायबाट खर्च कटाएर नाफामा कर तिरिरहेका छौं । आफ्ना कर्मचारीहरु पालिरहेका छौं । काम गरेर दुई रुपैया कमाउनु त पक्कै नराम्रो होइन । सरकारले अनुमति दिएर नै हामीले काम गरिरहेका छौं । अझै पनि सरकारले व्यवसायको प्रकृति हेरेर केहि समयका लागि सरल कर्जा दिएको खण्डमा व्यवसायीले काम गर्न सक्छन् । एक अर्बको व्यवसाय गर्नका लागि ५० करोड आफुसँग भएपनि व्यवसायीले ५० करोड बैंकबाट लगानी गराउन चाहन्छन् । किनकी अहिले व्यवसाय गर्न पक्कैपनि सहज छैन । सरकारले सहजिकरण गरिदिएको खण्डमा नागरिक र व्यवसायीहरुले सरकारलाई नराम्रो गर्ने काम पक्कै गर्ने छैनन् । यदि कसैले गलत गरेको छ भने सरकारले अनुगमन र कारबाही पनि गर्न सक्छ । त्यो अधिकार सरकारसँग सुरक्षित नै छ ।


० व्यवसायीहरु आफै पनि बैंकमा एउटा विवरण र कर कार्यालयमा अर्को विवरण बनाउनुपर्ने हाम्रो बाद्यता छ भन्नुहुन्छ नी ?

हामीले कुनै प्राइभेट कम्पनी दर्ता गरेको खण्डमा दुई वर्षको प्रोजेक्ट रिपोर्ट तयार गर्नुपर्दछ । संस्था दर्ता गरेको छ महिनामा मात्रै बैंकले ऋण प्रवाह गर्छ । त्यो समयसम्म कारोबार धेरै भइसकेको हुँदैन । अनुगमनको क्षेत्र बलियो हुनुपर्दथ्यो । तर, हामी कहाँ त्यो पनि छैन । कुनै प्रोजेक्ट बनाउँदा मैले दुई सय जना कर्मचारी राख्छु । चार अर्ब कमाउँछु भनेर भन्न पाए । प्रस्ताव पेश गर्दा त्यो गरिन्छ । तर, त्यहि बमोजिमका कर्मचारीहरु प्रयोग गरिएन, कच्चा पदार्थ प्रयोग हुने अवस्था आएन । यसरी कमाउने अवस्था आएन भने तल माथि हुन सक्छ । कसैले दुई करोडका पुँजी राखेर २० अर्बको व्यापार पनि गरेका छन् । दुई करोडको लगानीमा २० करोडको ब्यापार हुन पनि सक्छ । त्यसलाई हामीले अन्यथा मान्नु हुँदैन । त्यसरी प्रोजेक्टका कुरालाई लिएर म्याच गरेन भन्न मिल्दैन । किनकी बजार अनुसार उद्योग स्थापना गरिसकेपछि त्यसका माग कस्तो हुन्छ ? बजारमा अहिले तिब्र प्रतिस्पर्धा छ । एकलौटी ब्यापार त कहिँ पनि हुदैन । त्यसैले प्रतिस्पर्धामा जाँदा कतिपय उद्योगहरु दुई चार वर्षमै बन्द भएको अवस्था पनि छ । तर, कतिपय कम्पनीहरु वर्र्षौ देखि चलिरहेको अवस्था पनि छ । यसरी हामीले राज्यलाई झुक्याएर कर छलेका छैनौं । यो देश बन्यो भने हामी पनि बन्छौं । देशको गौरव भयो भने मात्रै व्यवसायीहरुलाई पनि गौरव हुन्छ । ति कुराहरुको हामीले मध्यनजर गरेर अघि बढ्छौं ।


० कोरोना भाइरस नियन्त्रणका लागि सरकारले झण्डै चार महिना लकडाउन त्यसपछि निषेधाज्ञाको घोषणा गरेको थियो । त्यसको बढि मारमा पर्यटन व्यवसाय पनि परेको छ । यसलाई तत्काल राहत र पुनस्थापित गर्नका लागि तपाईहरुको समूहले जित हासिल गरेपछि कस्ता कार्यक्रमहरु ल्याउने छ ?
कोरोना भाइरसको महामारी यो पीढिले भोगेको थिएन । धेरै पहिला आएको रहेछ । हामीले पाँच वर्ष अगाडि बिनासकारी भूकम्पको मार खेप्यौं । अहिले कोभिड–१९ को महामारी आयो । पर्यटन क्षेत्रको हकमा अहिले सरकारले पाँच प्रतिशत व्याजदरमा सरल कर्जा दिने भनेर ५० अर्बको रकम तोकेको छ । त्यसका लागि इम्प्लिमेन्टेशनका दिशामा अघि बढिरहेको छ । अहिले अन्य उद्योग र व्यवसायमा पनि त्यहि ढंगले अघि बढ्नुपर्दछ भन्ने लाग्छ । यो कोरोना भाइरस लामो समय रहँदैन र व्यवसाय अहिले नोक्सानमा भएपनि दुई तीन वर्ष पछि अवश्य नै नाफामा आउँछ । अहिले विश्व बजारमा यसको खोप आइसकेको छ । हामी कहाँ पनि छिट्टै आउने छ । त्यसपछि व्यापार बिस्तारै चलायमान हुनेछ । त्यो अवस्था नहुन्जेल सरकारले व्यवसायीहरुलाई सहयोग गर्नुपर्दछ । हाम्रो मूख्य चुनौति भनेकै बैंकको ब्याज हो । हामी चैत्र मसान्तसम्म तिनुपर्ने व्याज अहिलेसम्म तिर्न सकेका छैनौं । यसरी बैंकले अर्को ब्याज नलगाएको खण्डमा पनि सहज हुन्छ भन्ने अवस्था छ । यसरी असोज मसान्त मात्रै होइन अहिले पुस मसान्तको समय दिइएको छ । यसैले सरकारले व्यवसायीको हितमा सरल कर्जाको व्यवस्था गर्नुपर्दछ । जबसम्म हामी व्यवसाय सूचारु गर्न सक्तैनौं त्यो समयसम्म कर्मचारीहरु पाल्न पनि बाद्यता छ । कम्पनी पनि चलाउनुपर्दछ । अहिले सरकारले भने जस्तै १० प्रतिशत मात्रै सरल कर्जा पाएर मात्रै पनि हुँदैन । त्यसबाट पुनः लगानी गर्ने कि कर्जा मात्रै तिर्ने ? किनकी कर्मचारीको तलब दिन पनि पुग्दैन । जमानत (कोल्याक्टल) राम्रो छ भने बैंकलाई ५० प्रतिशत कर्जा थप गर्न गाह्रो छैन । किनकी हिजो ऋण प्रवाह गर्दा पनि ५० प्रतिशत मात्रै ऋण प्रवाह गरिएको हुन्छ । त्यसैले ५० प्रतिशत ऋण प्रवाह गर्दा बैंकलाई अप्ठ््यारो हुँदैन । बैंक पनि पब्लिकको पैसाले नै चलेका छ । त्यसलाई पनि त बिगार्नु हुँदैन । अहिले उद्योगी व्यवसायी कसरी चलाउने ? कर्मचारीको तलव ५० प्रतिशत सरकारले दिनुप¥यो भनेर अनुरोध गर्दा सरकारले टेर पुच्छर नै लगाएन । नयाँ ठाउँमा काम गर्न जान पनि कर्मचारीले पाउने अवस्था छैन । नयाँ काम नपाउने भएपछि परिवार पाल्नका लागि स्वास्थ्य मापदण्ड पुरा गरेर काम गर्न तयार हुनुहुन्छ । तर, उद्योग चलिरहेको छैन । माग भए नै आपुर्ति हुन्छ । त्यसैले अहिले माग पनि छैन र आपुर्ति पनि छैन । यसरी विबिध कारणले गर्दा हामी समस्यामा छौं । हिजोको उद्योग बाणिज्य महासंको निर्वाचन र अहिलेको उद्योग वाणिज्य महासंघको निर्वाचन फरक भएका कारण यो विषम परिस्थितिमा व्यवसायिक मानिसहरुको प्रतिनिधित्व हुन जरुरी छ । त्यसैले उद्योगीको मर्का बुझेको मानिस प्रतिनिधित्व गरेका खण्डमा उनीहरुको हकहितमा काम गर्न सक्छन् । तब मात्रै ब्यवसाय राम्रो भएर अघि बढ्न सक्छ । नत्र हामीले पछुताउनुपर्ने अवस्था हुन सक्छ । हामीले त्यो खालको राहत पनि नपाउन सक्छौं । हामीले सरकारसँग निशुल्क रुपमा राहत मागेका पनि छैनौं । त्यसैले एकदमै न्यून ब्याजदरमा कर्जा लगानी गरिनुपर्दछ भन्ने हाम्रो माग हो ।


एक जना उद्यागीले सरकार कि बैंक रोज कि उद्योग भन्नुभएको थियो । बैंकमा पैसा प्रशस्त छ । तर, लगानी भएको छैन । किन यो अवस्था आयो ?
हामीसँग कोल्याक्टलको हकमा कुनै समस्या छैन । ऋण प्रवाह पनि भइरहेका छन् । तर, पर्यटन क्षेत्रमा काम गर्ने कर्मचारीहरु जो भारी बोकेर हिमाल चढ्न जानुुहन्छ । गाइड र पद् प्रदर्शक बनेर पर्यटकको सेवा गर्नुहुन्छ । उहाँहरुसँग कोल्याक्टल त हुँदैन । यसरी उहाँहरुलाई गाइड लाइसेन्स राखेर निश्चित रकम बैंकले कर्जा प्रवाह गर्ने भनेकोमा पनि आलटाल भइरहेको छ । त्यसका लागि कम्पनीको सञ्चालकको पनि सिफारिस चाहिने भनिएको छ । यसरी उद्योगी व्यवसायीहरुले अहिले पनि ऋण त पाइरहेका छन् । तर, हाम्रो माग चाहिँ सफ्ट लोनमा पाउनुपर्छ भन्ने हो । यसरी अहिले हामीले ८ प्रतिशत भन्दा तल झर्न गाह्रो भइरहेको अवस्था छ । तीन देखि पाँच वर्ष सम्मका लागि हामीले सफ्ट लोन (सरल कर्जा) पाउन सकेनौं भने हामी टिक्न साह्रै गाह्रो छ । किनकी हामीले अहिले लिने ऋण भनेको ऋण माथि ऋण थप्नु नै हो । जसको समयमा ब्याज बुझाउनु पनि हो । अहिले हामीले १० महिना देखि ब्याज बुझाएका छैनौं । किनकी व्यवसाय गर्ने भनेर पैसा जम्मा गरेका छैनौं । व्यवसाय गर्नेले कमाउने र तिर्ने भन्ने आफ्नै सोचहरु हुन्छन् । अहिले सबै बैंकमा रकम छ । हिजोको अवस्थामा हामीले १३ देखि १५ प्रतिशत व्याज बुझाएका थियौं । तर, अहिले ७÷८ प्रतिशतमा झरेको छ । यो त ५० प्रतिशत कमी हो । जमानत र परियोजना ठीक हुनेका लागि अहिले पनि बैंकले ऋण दिइरहेको छ । तर, बाहिरी रुपमा भन्दा हामीले कि बैंक रोज कि ब्यवसाय भन्ने हो । सरकारले नीति बनाउँदा राम्रो बनाउँ भन्ने हो । किनकी सरल कर्जा दिने भन्न साथ हाम्रा ४३ प्रतिशत व्यवसायीहरुले कोभिड–१९ भन्दा अघिको महाविनासकारी भूकम्पमा सुबिधा उपयोग गरे । ४३ प्रतिशतले मात्रै उपयोग गर्नु त भएन नी ? कम्तीमा ८० प्रतिशतले यो सुबिधा पाउनुपर्दथ्यो । यसरी सुविधा लिने कुरामा धेरै ठूलो मापदण्ड बनाईन्छ । यो अप्ठ्यो अवस्थामा त्यउो सोचाई हुनुहुँदैन । बैंकले सुरक्षा हेर्ने हो । पहिलो कुरा त व्यवसायबाट तिर्न सक्छ भनिकन प्रोजेक्ट हेर्छ । यदि ब्यवसाय नै भएन भने मात्रै जमानतले कभर गर्न सक्छ कि सक्दैन भनेर अनुमान गर्ने हो । यी कुराहरु हेरेर ऋण थप्न गाह्रो छैन । तथापि व्यवसायीले ऋण मात्रै कहिलेसम्म थप्ने ?
हाम्रो अबको बिकल्प भनेको कोरोना भाइरस एकतिर हिड्छ हामी अर्कोतिर हिड्ने हो । पहिलो पटकको १२० दिनको लकडाउन गलत साबित भएको छ । त्यो नभएको भए अहिले धेरै राम्रो हुने थियो । यो आर्थिक वर्ष पछि भएको भए हामीलाई केहि सहज हुने थियो । अहिलेको परिस्थितिमा जुन मौद्रिक नीति आएको छ । त्यहि ढंगले काम होला । भइपनि रहेको छ । अहिले बढि मारमा अन्तर्राष्ट्रिय पर्यटक आउने व्यवसाय नै परेको छ । तथापि स्थानीय बजारमा पनि यसको असर छ । नेपालको पर्यटन भनेको यहाँ कच्चा पदार्थ बाहिरबाट आयात गर्नु पर्देन । हाम्रा कच्चा पदार्थ हाम्रै बजारमा छ । हाम्रो सुन्दरता नै त्यहि हो । पहिलो गन्तब्यका रुपमा पर्यटकहरु नेपाल छिरेपछि त्यहिको खानपिन र भेषभुषाहरु नै हुन् । हाम्रा स्थानीय उत्पादनमा त्यहि कारणले कमि आएको छ । अहिले होटल रेष्टुरन्ट, हर्स राइडिङ, टे«किङ जस्ता कम्पनीहरु समस्यामा छन् । त्यसैले यो महामारीमा राज्यले बचाउँन जरुरी छ । अहिले नेकपाको झण्डै दुई तिहाईको सरकार छ । यसले व्यवसायीको हक हितमा काम गर्नुपर्दछ । तर, सुनुवाई कम भइरहेको छ । त्यसैले चन्द्र प्रसाद ढकालको नेतृत्वमा रहेको समूहले व्यवसायीलाई राहत दिने काम गर्ने छ । साथै व्यवसायहरुलाई सहयोग गर्ने छ । त्यसका लागि हामीले ब्यापक रुपमा लबिङ गर्नेछौं ।


० अन्तमा केहि भन्नु छ कि ?

नेपाल उद्योग वाणिज्य महासंघको आसन्न निर्वाचनमा सम्पूर्ण उद्योगी व्यवसायी, मतदाता, दाजुभाइ दिदी बहिनीमा चन्द्रप्रसाद ढकाल समूहलाई अत्याधिक मतले विजयी गराउनका लागि म पनि एशोसियट सदस्यको उम्मेदवार भएका नाताले हार्दिक अनुरोध गर्न चाहन्छु ।

Leave a Reply

Your email address will not be published. Required fields are marked *

Copyright © All rights reserved. | Newsphere by AF themes.